Құрметті киноиндустрия өкілдері!

Өткен жылы киноиндустрияда көптеген оң өзгерістер орын алды.
Негізгі реформалардың бірі – мемлекеттік қолдауға ие болатын киножобаларды конкурс арқылы іріктеудің жаңа ережелері. Бұл ережелер іріктеу рәсімін барынша ашық және айқын етуді көздейді. Мемлекет басшысының қолдауымен жүзеге асқан бұл және өзге де өзгерістер бүгінде кино саласының дамуына маңызды серпін беруде.
Бүгін осы жаңа ережелер бойынша көптен күткен киножобалар конкурсы жарияланды.
Ережеге сәйкес, конкурстың бірінші кезеңінде әуелі сценарий мен сценарий жоспарлары қабылданып, Сараптама кеңесінің қарауына жіберіледі. Бұл жерде ескеретін жайт, үміткерлер сценарийді конкурс жайлы хабарландыру жарияланғаннан бастап 5 жұмыс күнінен кешіктірмей, Кино орталығына электронды түрде жолдауы қажет. Өтінімдерді қабылдау Кино орталығының сайтында 5-13 наурыз аралығында жүргізіледі.
Бұл ретте Сараптама кеңесі жобаларыңызды анимациялық, ойын, деректі-хроникалы фильмдер бойынша сүзгіден өткізуге дайын. Екінші кезеңде құжаттар пакеті қаралып, анықталған қателерді түзетуге 3 күн уақыт беріледі. Ашық қорғау және питчинг онлайн трансляция арқылы өтеді.
Біздің мақсатымыз – ашық әрі әділ конкурс өткізу. Алдағы уақытта іріктеуге қатысты ақпараттар министрліктің және орталықтың ресми сайтында және әлеуметтік желілеріндегі аккаунттарында үздіксіз жарияланады. Конкурстық іріктеуге қатысты сауалдарыңыз болса, Кино орталығы жанынан консультация жұмыстары да іске қосылғанын хабарлаймын!
Өздеріңіз білетіндей, бұған дейін биыл кино түсіруге арналған басым тақырыптар жарияланған болатын. Осының негізінде тұшымды дүние дайындап, көрерменге сапалы дүние ұсынуға күш салады деп сенеміз! Барлық қатысушыларға алдағы конкурста сәттілік тілей отырып, Сіздерді ұлттық киноның көкжиегін кеңейтуге атсалысуға шақырамын!