Әзербайжан астанасында өткен VIII Баку халықаралық кітап жәрмеңкесі аясында түркітілдес елдердің баспа бірлестіктері арасында кездесу өтті. Жиынға Әзербайжан, Түркия, Қазақстан, Қырғызстан, Өзбекстан елдерінің баспагерлері қатысты.

Әзербайжан Баспагерлер қауымдастығының (ANAIB) басқарма төрағасы, филология ғылымының докторы Шамиль Садық түркі елдерінің баспа одағын құру қажеттігі туралы айтып өтті: «Бұл одақ кітап индустриясының дамуына зор үлес қосумен қатар, елдеріміз арасындағы мәдени көпір рөлін атқаратын болады. Біз Ыстамбұлда болғанымызда қымбатты досымыз Мұстафа Гарагуллуоғлымен осы тақырыпты талқылап, осы мақсатқа жету үшін күш біріктірудің маңыздылығын талқыладық».

Ш.Садық кездесудің қазан айында дүниеге келген ұлы ойшыл Хусейн Джавидтің мерейтойына орай ұйымдастырылғанын да айта келіп: «Хусейн Джавид өз шығармашылығымен ортақ түркі тілін жасауға тырысты. Ұлы ұстаздың басты мақсаты бір өлеңінде: Мәдениет, мәдениет, тек мәдениет – Тұран үшін ұлы күш қылыштан өткір!» делінген. Сөз соңында төраға бұл одақтың құрылуы түркі әлеміндегі мәдени байланыстар үшін маңызды жаңалық болатынын айтты.

Одан кейін Түркия Баспагерлер қауымдастығының басқарма төрағасы Мұстафа Гарагуллуоғлы алдымен Ташкентте, кейін Бакуде өткен отырыстарда жүргізілген пікірталастарға сүйене отырып, мұндай одақ құруға мемлекеттердің де мүдделі екенін айтты: «Қонақ Түркияда өткізілген Ыстамбұл Publishing Fellowship бағдарламасының елі 2021 жылы Әзербайжан және 2022 жылы Венгрия болды. Өзбекстан келер жылдың наурыз айында шараның қонағы болады. Қазақстан мен Қырғызстан алдағы жылдарда қонақ елдер ретінде жоспарлануда».

М.Гарагуллуоғлы Баспагерлер одағының бастамасы бейресми форматта қалмауы керектігін атап өтіп, бұл үшін өзінің барлық мүмкіндігін пайдалануға уәде берді. Қазақстан баспагерлері және баспагерлер қауымдастығының басшысы Әділ Қойтанов мәдени жақындықты дамыту мақсатында бауырлас түркі халықтарының әдеби антологияларын өз елінде басып шығаруға болатынын атап өтті. Сонымен бірге, әдеби байланыстарды нығайту үшін одаққа мүше елдердің авторларының шығармалары аударылып, бұл үшін аудармашылардың ортақ базасы жасақталуы қажеттігін қадап айтты.

Сондай-ақ, жиында ортақ әдеби ортаны қалыптастыру және үйлесімді дамыту мақсатында қатысушы елдердің авторларының кездесулерін ұйымдастыру ұсынылды. Өзбекстан Баспагерлер және кітап саудагерлері одағының төрағасы Эркін Абдуррахманов мұндай кездесулердің жиі өткізіліп тұруының маңыздылығын айтып, түркітілдес елдер баспалары арасында, әсіресе, ақпарат алмасу саласында ынтымақтастық орнату қажеттігін айтты. Шамиль Садық Түркі әлемі баспагерлер одағының бір жыл мерзімге уақытша төрағасы етіп «Алтун Китаб» баспасының директоры, ф.ғ.д. Рафик Исмаиловты сайлау туралы ұсыныс жасап, бұл кандидатура бірауыздан қабылданды.