25 қазан - жазушы, драматург, Абай атындағы Мемлекеттік сыйлықтың,  ІІ дәрежелі «Отан соғысы», «Қызыл Жұлдыз» (2 рет), «Еңбек Қызыл Ту», «Құрмет Белгісі» ордендерінің иегері, Қазақстанның Халық жазушысы Тахауи Ахтановтың туған күні.

Ол 1923 жылы Ақтөбе облысы, Шалқар ауданы, Шетырғыз ауылында дүниеге келген.

1940 жылы Абай атындағы Қазақ мемлекеттік педагогика институтына оқуға түсіп, екінші курста майданға аттанады. Алғашқы әдеби көркем шығармалары майдандық басылымда жарияланды. Өлеңдері соғыстан кейін жарыққа шыққан «Жастар дауысы» атты ұжымдық жинаққа енген.

Қызмет жолын 1953-1957 жылдары «Жұлдыз» журналының редакторы, Қазақстан Жазушылар одағы басқармасының хатшысы қызметтерінде бастаған. Сонымен қатар, «Көркем әдебиет» баспасында редактор, бөлім меңгерушісі, киностудияда сценарий бөлімінің бастығы болған.

1956 жылы «Қаһарлы күндер» романы, 1968 жылы «Сәуле» одан кейін жарыққа шыққан  «Боран», «Ант», «Әке мен бала» драмалары қазақ сахнасының өміршең туындыларына айналды.

Жазушының «Махамбет мұңы», «Дала сыры» кітаптары және «Таңдамалы шығармалары», 5 томдық шығармалар жинағы жарық көрді. Сондай-ақ, туындылары орыс, неміс, өзбек, қырғыз, тәжік, түрікмен, грузин, украин, беларус тілдеріне аударылған.

Көркем аударма саласында А. Пушкиннің «Алтын әтеш туралы ертегісін», А. Толстойдың «Азапты сапарда» трилогиясын, С. Бабаевскийдің «Алтын жұлдызды жігіт» романын, И. Тургенев пен А. Горький әңгімелерін қазақ тіліне аударды.

Тахауи Ахтанов 1975-1984 жылдары Ұлттық мемлекеттік кітап палатасының директоры қызметін атқарған. 

Жазушы 1994 жылы дүниеден өтті.