Ұлттық мемлекеттік кітап палатасының «Асыл сөз» сұхбат жобасының рухани қоржыны тағы да бір келелі кездесумен, сырлы сұхбатпен толықты. Сәрсенбінің сәтінде Қазақстан Республикасы егемендік алған жылдары ҚР Қорғаныс министрі, ҚР ҰҚК төрағасы, ҚР Президенті Күзет қызметінің бастығы, ҚР Республикалық гвардиясының қолбасшысы сияқты ірі лауазымды қызметтер атқарып, еліміздің әскери саладағы әлеуетін арттыруға үлес қосқан, ұлттық қауіпсіздікті қамтамасыз етуге тер төккен генерал-полковник Сәт Тоқпақбаев Кітап палатасының «Асыл сөз» сұхбат жобасына қонақ болып келді.

Ұлттық мемлекеттік кітап палатасының Баспасөз мұрағатында сақталған газет-журналдардан өзі жазған, өзі туралы жазған мақалаларды көріп, ризашылық білдірді.

Ертеректе Әбдіжәмил Нұрпейісов «Курляндия» романын М. Әуезовке алып барғанда «Оқтың тілі – шолақ тіл, сен мына шығармаға біраз тіл тауыпсың» деп баға берген екен. Сәт Бесімбайұлы да өз өмірінен, ұлт тағдырынан, мемлекет күнделігінен алынған түрлі қызықты деректерді қамти отырып, бірнеше кітап жазған.

Сәт Бесімбайұлы қаламынан туған үлкенді-кішілі еңбектердің ішінде «Жаным садаға» ғұмырбаяндық еңбегінің шоқтығы биік. Бұл еңбекте Қазақстан Республикасы Тәуелсіздік алған жылдардағы әскердің халі, қорғаныс саласының тұралап қалғанының көрінісі, осындай ауыр мәселелердің шешілу жолдары көрсетіледі.

Өзінің іскерлігімен, кәсібилігімен, табандылығымен көптеген жетістіктерге жеткен кейіпкеріміз де «Асыл сөз» төрінде шешіле сөйледі. Көптеген тақырыптарға барысып, қызметкерлердің қойған әрбір сұрағына жауап беріп, жылы қоштастық.

Кездесу соңында ардагер ақсақал мекемеге, қызметкерлерге өзінің батасын беріп, жұмысымызға, қолға алған әрбір бастамамызға сәттілік тілеп, қолтаңба қалдырды.