Қазақстан Республикасы Тәуелсіздігінің 30 жылдық мерейтойы – барша қазақстандық үшін орны бөлек, маңызы зор, аса қасиетті мереке. Осынау ұлық мереке қарсаңында еліміздің жер-жерінде түрлі іс-шаралар өтуде. Ұлттық мемлекеттік кітап палатасының ұжымы да осы үрдіс көшіне ат қосып, ұжымдық іс-шара өткізді.

Ұлттық мемлекеттік кітап палатасының директоры Әділ Қаженбайұлы ұжым қызметкерлерін Тәуелсіздіктің 30 жылдығы мерекесімен құттықтап, жылы лебізін білдірді.

«Тәуелсіздік – баршамыз үшін қасиетті ұғым. Біздер Тәуелсіздікке дейінгі және Тәуелсіздік алғаннан кейінгі уақытты қатар көрдік. Егемендікке жетер ештеңе жоқ. Азаттықтан ардақты ұғым таппайсыз. Бүгінгі күні мемлекетіміз әлемге танымал, қуатты әрі бақуатты елдер қатарына қосылып отыр. Болашақ – жастар қолында. Біздер, сіздер – болашақ үшін бүгінгі күннің тарихын жазып отырған мамандармыз. Сондықтан, аманаты ауыр еңбектеріңізге табыс тілеймін!» - деді ол.

Әрі қарай сөз кезегі ұжыммен кездесуге арнайы шақырылған қадірлі қонағымыз – белгілі ақын, жұмекентанушы, профессор Алмас Ахметбекұлына берілді.

«Отан – адам баласы үшін ең ыстық сөз, ең қуатты, ең мейірімді сөз. Арқасүйер Отаны бар қазақ – бақытты қазақ. Бүгінгі байтақ даламыздың тұтастығын сақтау, руханиятымызға адал қызмет ету, тарихымызды зерделеу – біздің келешек ұрпақ алдындағы парызымыз. Сондай аса жауаты шаруамен айналысып отырған қажырлы ұжымның бірі – осы Кітап палатасы. Ел Тәуелсіздігінің 30 жылдық мерейтойы құтты болсын! Қызметте табысты болыңыздар!» - деп тілек білдірген ақын асқан тебіреніспен бірнеше өлең оқып, ұжым қызметкерлерінің рухын көтерді.

Желтоқсан оқиғасына 35 жыл толуына орай Ұлттық мемлекеттік кітап палатасының Баспасөз мұрағаты бөлімінің басшысы, Желтоқсан оқиғасының қатысушысы Гүлзада Нұралиеваның тарихи дата туралы баяндамасы тыңдалды.

Бұдан әрі Ұлттық мемлекеттік кітап палатасының жас мамандарынан құралған топтың «Тәуелсіздік құрдастарының тартуы» атты поэтикалық қойылымы тамашаланды.

Мерекелік іс-шара барысында «Атамекен» әні хормен шырқалды. Ұжым қызметкерлері Тәуелсіздік мерекесі қарсаңында ортамызға қадірлі қонақ болып келген Алмас Ахметбекұлының сөзіне жазылған «Көк тудың желбірегені» әнін автормен қосыла шырқап, іс-шараның патриоттық салмағын одан әрі арттыра түсті.

Тәуелсіздік – бұл елдігіміздің айғағы, мәңгі азаттыққа ұмтылған еркін халықтың бас құндылығы, барша қазақтың қастерлі бойтұмары. Тәуелсіздігіміз баянды, елдігіміз мәңгілік болсын!