Қазақстан Республикасы Мәдениет және спорт министрлігін 2019 жылдан бүгінгі күнге дейін басқарып келген Райымқұлова Ақтоты Рахметоллақызы – мәдениет саласының майталманы, іскер басшы, сала жанашыры.

Ақтоты Рахметоллақызы басшылық еткен жылдары еліміздің мәдениет, спорт салалары жоспарлы түрде дамыды. Әсіресе, кітап шығару ісі, кітап тарату мәселелері жолға қойылды.

Нәзік жанды бола тұра, ер азаматтармен үзеңгі қағыстыра жүріп, елдегі эпидемиологиялық ахуалдың өршіп тұрған тұсында да жұмысты тоқтатпады. Жазушының отбасында өскен министр бүгінгі күнгі қаламгерлермен де оңай тіл табысып, көптеген қордаланған мәселелердің шешілуіне атсалысты.

Мәдениет және спорт министрлігіне қарасты мекемелердің барлығы өз даму жоспарларына сәйкес жұмыс істеді. Ауқымды әрі түйіні көп саланы жаһандық дүрбелең тұсында абыроймен басқарып, саланың даму қарқынын арттырған Ақтоты Рахметоллақызына алғыстан өзге айтарымыз жоқ.

Алдағы уақытта қызметіне табыс, отбасына береке, денсаулық және сәттілік тілейміз!

Кеше Президент Қасым-Жомарт Тоқаев жаңа Үкімет құрамын бекітті. Қазақстан Республикасы Мәдениет және спорт министрі болып Абаев Дәурен Әскербекұлы тағайындалды.

Дәурен Әскербекұлы – мемлекеттік қызметтің барлық сатыларынан өткен аса білікті тұлға. Жылдар бойы ақпарат саласын басқарып, бірқатар жаңашылдықтар енгізгенін ел біледі.

Мемлекет басшысының сенімді кадрларының бірі саналатын Дәурен Әскербекұлының мәдениет және спорт салаларының басшылығына тағайындалуы – сала дамуын Президенттің өзі қадағалап отыратынын айғақтайтын әрекет.

Дәурен Әскербекұлына жаңа қызметінде табыс, жетістіктер тілейміз!

#КүшімізБірлікте