Биыл – қазақтың күміс көмей, жез таңдай әншісі, әлемге аты әйгілі ұлы тұлғасы, ұлт мақтанышы Роза Бағланованың туғанына 100 жыл. Әншінің ғасырлық мерейтойы қарсаңында еліміздің түкпір-түкпірінде мерекелік концерттер қойылып, Алматы және Қызылорда қалаларында әншінің ескерткіші қойылды.

«Өнер 21-ғасыр» баспасынан жарық көрген «Роза Бағланова» кітап-альбомының тұсаукесер рәсімі Eurasian Book Fair-2022 халықаралық кітап көрме-жәрмеңкесінде өтті.

Салтанатты рәсімге ҚР Мәдениет және спорт министрі Дәурен Абаев қатысып, Сенат депутаты Нұртөре Жүсіп, Мәжіліс депутаты Бақытбек Смағұл, ақын Несіпбек Айтұлы және ақын Маралтай Райымбекұлы сияқты бірқатар зиялы қауым өкілдерімен бірге кітап-альбомның тұсауын кесті.

«Аты аңызға айналған, кешегі зардапты соғыста майдан даласында шырқата ән салып, жауынгерлердің рухын көтерген опера және эстрада әншісі – Роза Тәжібайқызының ғасырлық мерейтойы – әрбіріміз үшін айрықша дата, ерекше күн.

Бүгін халқымыздың жезтаңдай әншісі – Роза Бағланованың ғасырлық мерейтойы қарсаңында «Өнер 21-ғасыр» баспасынан шыққан «Роза Бағланова» атты кітаптың тұсауын кескелі тұрмыз. Халықтық тұлғаның өмір соқпағының әр кезеңін бейнелеген фотосуреттер бір кітапқа тоғыстырылып, жас ұрпақ үшін аса құнды дүние жарияланып отыр», - деді Дәурен Әскербекұлы.

Ақын, «Түркістан» халықаралық газетінің бас редакторы Бауыржан Бабажанұлы жүргізген рәсім өз деңгейінде өтіп, қонақтардың риясыз ақ тілегімен тәмәмдалды.