Ағымдағы жылдың 5 маусымында Қазақстан Республикасы Конституциясының 33 бабына өзгертулер енгізу бойынша Жалпыхалықтық референдум өтеді.

«Жаңа Қазақстан» құру туралы Мемлекет басшысының бастамасы – еліміздің болашағын жарқын ету мақсатындағы, еліміздің даму бағытындағы кейбір кедергілерді жойып, мүмкіндік ашатын бастама.

Референдумға қатысу – әр азаматтың позициясын білдіретін, таңдауын жасайтын саяси науқан. Осы саяси науқан нәтижесінде Қазақстан Республикасының болашағын бірге таңдап, дауыс беруге барынша атсалысуымыз керек.

Бүгінгі күні Президент Қасым-Жомарт Кемелұлы алға қойған міндеттемелерді орындау, саяси реформаларды жүзеге асыру ісі басталып кетті. «Жаңа Қазақстан» концепциясының толық іске қосылғанын, негізгі міндеттемелерді сатылы түрде жүзеге асыру жұмыстары басталғанына өзіміз куә болып отырмыз.

Мемлекет басшысы «Жаңа жағдайдағы Қазақстан: іс-қимыл кезеңі» атты Жолдауында мемлекеттік құрылымдардың жұмысын оңтайландырып, халық пен билік арасындағы алшақтықты жойып, негізгі әлеуметтік мәселелерге жедел түрде шешім табу керектігін баса айтқан.

Бүгінгі таңда қоғамдық-саяси аренада орын алып жатқан өзгерістер, мемлекет тарапынан халықтың әл-ауқатын көтеруге бағытталған бағдарламалар, халықаралық деңгейдегі маңызды қадамдар – осы жұмыстардың жүзеге асып жатқанының айғағы.

Ата Заңымызға енгізілгелі отырған өзгерістердің барлығы әлеуметтік-саяси мәселелерді шешуге, халқымыздың әлеуметтік жағдайын арттыруға және қоғамдық келісімді қалыптастыруға, мемлекетімізді одан әрі дамытуға бағытталған деп сеніммен айтуға болады.

Осынау тарихи өзгерістер қарсаңында мемлекеттік маңызы бар науқанға белсенділік таныта отырып қатысуымыз керек. Осылайша біз болашағымызды бірге таңдаймыз! «Жаңа Қазақстан» - мүмкіндіктер мен даму дәуірі.  
 

ҚР Ұлттық мемлекеттік 
кітап палатасының директоры 
Әділ ҚОЙТАНОВ