Алматы қаласында Кенесары Қасымұлының туғанына 220 жыл толуына орай, Халықаралық «Алаш» әдеби сыйлығы мен Қазақстан Жастар одағы сыйлығының лауреаты Әділбек Ыбырайымұлының «Семсер жүзіндегі серт» атты роман-трилогиясының тұсаукесері өтті.

Шара барысында Қазақстан ПЕН-клубының президенті Бигелді Ғабдуллин, Халықаралық әдеби «Алаш» сыйлығының лауреаты Мамытбек Қалдыбаев, жазушы, «Атамұра» баспасы президентінің кеңесшісі Кәдірбек Сегізбаев, Халықаралық «Алаш» әдеби сыйлығының лауреаты Ғұсман Жандыбаев филология ғылымдарының докторы, профессор, Қазақстанның еңбек сіңірген қайраткері Дүкен Мәсімханұлы және өзге де қонақтар сөз сөйлеп, жазушының шығармашылығы жөнінде лебіздерін білдірді. Сондай-ақ, мазмұны мен мәні, жазу ерекшеліктері жан-жақты талқыланды.

Тұсаукесерден бөлек, ҚР Ұлттық кітапханасының қорынан Ә.Ыбырайымұлының өмірі мен шығармашылығына арналған «Қалам ұшындағы ғұмыр» атты кітап көрмесі ұйымдастырылды.