Жақында Алматы қаласындағы Т. Жүргенов атындағы Қазақ Ұлттық өнер академиясында Балалар жылына орай «Көпмәдениетті әлемдегі балалар мен кітаптар» атты ІІІ Халықаралық конгресі өтті. Шараны ұйымдастыруға Қазақстан халқы Ассамблеясының ғылыми-сараптамалық кеңесі, «Altair» балалар кітап академиясы, «Аударма институты» АҰО және «Мир через Духовность» қоғамдық бірлестігі атсалысты.

Конгресс барысында балалар әдебиетін дамыту бойынша педагогтар, ғалымдар, кітапханашылар, баспагерлер мен аудармашылардың байланысын нығайтып, жас жеткіншектерге арналған ұлттық әдеби мұраны сақтау мәселесі талқыланды. Сондай-ақ, конгерске қатысқан қазақстандық және шетелдік мамандар әлем бойынша балалардың кітап оқуға қызығушылығын арттыру, балалар тақырыбына жазатын авторларды ынталандыру, сол бағыттағы кітаптарды басып шығару мәселесін қозғап, ойларын ортаға салды. Алқалы жиында ҚР Ұлттық мемлекеттік кітап палатасы директорының орынбасары Толқын Салменбаева да сөз алып, балаларға арналған кітап ісінің бүгінгі жағдайы туралы баяндама жасады.

Ауқымды шара аясында құрметті қонақтар ҚР Ұлттық мемлекеттік кітап палатасына арнайы келді. Атап айтқанда, «Altair» балалар кітап академиясының жетекшісі Джемма Аманжолова, «Аударма институты» АҰО (көркем аударма теориясы мен тәжірибесін дамытуға жәрдемдесетін автономды коммерциялық емес ұйымының) атқарушы диреторы Евгений Резниченко және ресейлік тарихшы, мәдениеттанушы, халықаралық көрмелер мен мәдени-ағарту жобаларының кураторы Анна Эспарса Кітап палатысының ұжымымен кездесіп, өзара қарым-қатынасты нығайту барысында пікір алмасты. Бұдан өзге, аударма мәселесі талқыланып, әсіресе екі елдің әдебиетін қазақ және орыс тіліне аудару жайында сөз қозғалды. Сондай-ақ, құрметті қонақтар алдағы қараша айында өтетін «Ұлы Жібек жолымен -2022» атты Халықаралық кітап көрмесіне қызығушылық танытты.