Жазушы Шерхан Мұртазаның архивінен алынған құнды құжат жарияланды. Оны әлеуметтік желіге жариялаған белгілі журналист Көсемәлі Сәттібайұлы болатын.

«Ақиқатты сүйетін Алаш баласы үшін бұл апта ерекше болғалы тұр. Өйткені қоғам өміріндегі ащы шындықты ашына айтып, өмірден халықтың құрметіне бөленіп өткен Мемлекет және қоғам қайраткері, Халық жазушысы Шерағаң – Шерхан Мұртаза дүниеге келген Әулиеата, Жуалы, Ақсай өңірінде бейсенбінің берекелі күніне орай 90 жылдық мерейтойы өтеді.

Оған Жамбыл облысының әкімі Нұржан Нұржігітовтен бастап күллі халық үлес қосуда. Мерейтой Шерағаң ескерткішінің ашылу салтанатымен басталады. Одан кейін Шерағаңның шығармашылығы мен қайраткерлік қызметіне арналған ғылыми конференция болмақ. Шерағаңның кіндік қаны тамған жері – Жуалы ауданындағы Талапты ауылынан қайраткер-қаламгердің музей-үйінің ашылуы да мерейтой мазмұнын аша түсетін тағылымды істің бірі.

Шерағаң тойы – шындықты сүйетін барша қазақтың тойы. Ал Шерағаң архивінен алынған мына құнды құжатты қаламгердің сол музей-үйіне шашылған шашу ретінде қабылдаңыздар» деп жазды ол.

Айта кетейік, бұл жәдігер Шерхан Мұртаза атындағы орталықта сақтаулы. Орталыққа Әлижан Мұртаза аманаттап тапсырған.