Иран Ислам Республикасының Алматы қаласындағы Бас консулдығының Мәдени өкілі Маджид Алигар мырза ҚР Ұлттық мемлекеттік кітап палатасына арнай келіп қонақ болды. Құрметті мейман өз кезегінде еліміздегі іргелі мекеме Кітап палатасының жұмыс барысына, жалпы Қазақстанның қазіргі таңдағы кітап нарығына қызығушылық танытты.
ҚР Ұлттық мемлекеттік кітап палатасының директоры Әділ Қойтанов мекеменің негізгі бағыты, осы тұрғыда атқарылатын істер турасында мейманға кеңінен әңгімелеп берді.
Кездесу барысында Маджид Алигар мырза дәстүрлі түрде өтіп келе жатқан Тегеран халықаралық кітап көрмесіне келер жылы қазақстандықтардың қатысу мәселесін де сөз етті. Мұндай көрмелерге қатысу екі ел арасындағы мәдени байланыстың нығаюына тікелей әсер етеді деген ол: «Келешекте Иранның рухани әлеміндегі кітаптарды тікелей қазақ тіліне аударуға қызығушылығымыз көп», - деді.
Сондай-ақ, Маджид Алигар мырза қарашаның 23-25 аралығында Алматы қаласында өтетін «Ұлы жібек жолы» халықаралық көрмесіне Бас консулдық атынан қатысуға ниетті екендерін жеткізді.
