Алматы қаласындағы Әл-Фараби атындағы Қазақ ұлттық университетінің Журналистика факультетінде белгілі журналист Ержұман Смайыл атындағы аудитория ашылды.

Заманауи аудиторияның ашылу салтанатында Ақпарат және қоғамдық даму министрі Дархан Қыдырәлінің хаты оқылды. Одан әрі Нұрлан Оразалин, Уәлихан Қалижан секілді қаламгерлер жылы естеліктерімен бөлісіп, жаңадан құрылған «Қазақ газеттері» ЖШС бас директоры Дихан Қамзабекұлының құттықтау хатын Астанадан арнайы келген әріптес інісі Самат Мұса оқып берді. Сондай-ақ, ҚР Архив және құжаттаманы басқару комитетінің төрағасы Қуат Бораш лебізін білдірді.

Университет ректоры Жансейіт Түймебаев алдағы уақытта ұлттық университеттің «Өнегелі өмір» сериясымен жинағы шығатынын жеткізді.

Аудиторияның ашылуына Мамадияр Жақып, Дәулет Сейсенұлы, Жанболат Аупбаев, Қорғанбек Аманжол, Жүсіпбек Қорғасбек, Қали Cәрсенбай, Шархан Қазығұл және т.б баспасөздегі аға буын өкілдері, Рахман Алшанов бастаған ғалымдар мен зиялы қауым қатысты.

Айта кетейік, Ержұман Өтешұлы Смайыл 1948 жылы 5 қаңтарда Алматы облысында дүниеге келген. Қазақ мемлекеттік университетін тәмамдаған. Қазақстан Республикасы Журналистика академиясының академигі, БАҚ саласындағы Президент сыйлығының тұңғыш лауреаты. Сондай-ақ Баубек Бұлқышев атындағы сыйлықтың лауреаты. Еңбек жолын «Социалистік Қазақстан» (қазіргі «Егемен Қазақстан») газетінің тілшісі болып бастаған. 1979-1987 жылдары – «Лениншіл жас» (қазіргі «Жас Алаш») газетінде редактордың орынбасары; 1987-2003 жылдары – «Егемен Қазақстан» газетінің бөлім меңгерушісі, редактордың орынбасары; бас редакторының бірінші орынбасары, бас редакторы. 2003-2010 жылдары «Егемен Қазақстан» республикалық газеті» ашық акционерлік қоғамының президенті, вице-президенті қызметін атқарған.