Асхат Оралов елімізде алғаш рет өтіп жатқан жабық кешендегі жеңіл атлетикадан X Азия чемпионатының ашылу салтанатына қатысты. Құрлық біріншілігі жеңіл атлетика күнтізбесіндегі ең маңызды жарыстардың бірі. Турниге қатысу үшін Астанаға 31 елден 360 спортшы келді. Қазақстан атынан жеңіл атлетиканың 24 түрі бойынша 69 спортшы қатысады. Азия чемпионаты 12 ақпанда аяқталады.

Мәдениет және спорт министрі Асхат Оралов қазақстандық мергендерді Әлем кубогындағы тарихи жеңіспен құттықтады. Ел құрамасы Джакартада өткен Әлем кубогында 3 алтын, 5 күміс және 3 қола жүлде жеңіп алып, жалпы медальдық есепте бірінші орынды иеленді. Әлем кубогында ұлттық құрама сапында 15 спортшы өнер көрсетті. Министр үзік нәтиже көрсеткен мергендерді құттықтап, жаттықтырушылар штабына алғысын білдірді.

Асхат Оралов Испанияның Қазақстандағы елшісі Хорхе Урбиоламен кездесті. Кездесуде екі мемлекеттің өзара қарым-қатынасы, сондай-ақ Алматыда жол-айналма мотожарысынан Moto GP - әлем чемпионатының кезеңін өткізу мәселелері талқыланды. Асхат Оралов спорттық дипломатия елдер арасындағы ынтымақтастықты нығайтып, туристерді көптеп тартатынын атап өтті. Испания елшісі Moto GP — бұл басты және ең беделді мотоцикл жарысы екенін айтты. Турнирге әлемдегі ең мықты шабандоздар, сондай-ақ мотоцикл техникасының озық өндірушілері қатысады.

Мәдениет және спорт министрлігінің қолдауымен қазақ тіліне дубляждалған «Аватар: Су жолы» фильмі абсолют рекорд орнатты. Ғылыми-фантастикалық туындының қазақ тіліндегі нұсқасын 43 мыңнан астам көрермен тамашалап, кассалық табыс алғаш рет 71 миллион теңгені құрады. Бұл Голливуд фильмдеріне дубляж жасаудың 12 жылдық тарихында тіркелген ең жоғары көрсеткіш.

2022 жылы Мәдениет және спорт министрлігі Туризм комитетінің нәтижелі жұмысының арқасында 7 елге 10 жаңа әуе бағыты ашылды. Енді қазақстандықтар Милан (Италия), Ираклион (Грекия), Нячанг (Вьетнам), Кувейт (Кувейт), Анкара (Түркия), Маэ аралы (Сейшел аралдары) мен Түменге (Ресей) тікелей қатынай алады. Жаңа бағыттардың ашылуы елге шетелдік туристердің көптеп келуіне де оң әсер етті. Мысалы, былтыр Қазақстанға келген шетелдік туристер саны 2021 жылмен салыстырғанда 3 есеге артты.

2022 жылы шетелден 7000 тарихи құжат елге қайтарылды. Құнды құжаттарда еліміздің тарихы туралы тың ақпараттар бар. Оларды қазір отандық тарихшылар мен ғалымдар зерттеп жатыр. Құжаттар Венгрия, Германия, Италия секілді және т.б. Еуропалық Одақ елдерінен әкелінген. Қазір Мәдениет және спорт министрлігі бірыңғай деректер базасын құру бағытында жұмыс жүргізіп жатыр.