ҚР Мәдениет және спорт министрлігі Архив істері және құжаттаманы басқару комитетінің Баспа ісі басқармасының басшысы Алмаз Мырзахмет әлеуметтік желіде тікелей эфирге шығып, баспа ісі және «Жаңа қазақ әдебиеті» жобасы туралы сұрақтарға жауап береді.

Спикер сөз басында мемлекеттік тапсырыспен шығатын кітаптар туралы жан-жақты мағлұмат беріп өтті. Сондай-ақ, ол сөз барысында «Жаңа қазақ әдебиеті» жобасына кеңірек тоқталды.

«Жаңа қазақ әдебиеті» - бұрын ешбір жерде жарияланбаған өте құнды еңбектер. Біз бұл көркем әдебиеттер мен рухани әрі елеулі құбылыстарға арналған кітаптарды бөлек сериямен шығаруды қолға алдық. Былтыр осы бастамамен 10 кітапты жарық көрді. Ол он кітап 30 мың данамен басылып, еліміздің түпкір-түпкіріне тарады. Биыл 14 кітапты «Жаңа қазақ әдебиеті» сериясымен шығарамыз, - деді Алмаз Мырзахмет.

Мырзахметтің айтуынша, бастама жас қаламгерлердің есімін танытып, әдеби туындыларымызды байытып жатыр.

«Мәселен, серияда Әлия Дәулетбаева, Қанат Әбілқайыр және кейінгі жырларымен халықтың ыстық ықыласына бөленген Маралтай Райымбекұлының еңбектері бар. Біз биыл көктемде Жаңа қазақ әдебиеті сериясымен шыққан кітаптардың тұсаукересін өткізуді жоспарлап отырмыз. Министрліктің жобасына Президенттің өзі келеді деп күтілуде. Одан бөлек, еліміздің белгілі жазушылары мен ақындарын шақырып, жыр жәрмеңкесін жасағымыз келеді», - деді ол.