Қазақ әдебиетінің көзі тірі классигі, жазушы-драматург Әкім ағаның (Әкім Тарази) шаңырағына Мәдениет және спорт вице-министрі Нұрқиса Дәуешов екеуміз арнайы бас сұғып, абыз ақсақалмен амандасып қайттық, - деп жазды ҚР Архив істері және құжаттаманы басқару комитетінің төрағасы Қуат Бораш өзінің әлеуметтік желідегі парақшасында.

«Бұйырса, көрнекті қаламгердің биылғы жылы атап өтілетін 90 жасқа толатын мерейтойын лайықты өткізу мәселелерін ақылдастық. Ақсақалдың асыл жары, дарынды драматург Роза апай (Роза Мұқанова) Әкім ағаны аялап күтіп отырғанына сүйсіндік. Дастархан басында ұлт руханияты мен төл әдебиетіміздің өткені мен бүгіні жайында өрелі әңгіме өрбіді. «Жақсыменен өткізген жарты сағат, жаманның өтіп кеткен ғұмырындай» деген сөз рас екен. Алла тағала қуат беріп, жүз жасаңыз Әкім аға!» - дейді ол. Бұл жөнінде жазушының жары, белгілі қаламгер Роза Мұқанова әлеуметтік желідегі парақшасында: «Аяулы бауырлар ағаларына еркелей келіп, шаңырақты шаттыққа бөлеп жүргенге не жетсін! Қазақтың сән-салтанаты - бірін- бірі аялап, құрмет тұтуында. Жадырап келіп, қанатын жайып жүретін ізгі ниетті БАУЫРЛАРЫМА АЛҒЫС айтамын!» - деп, жылы лебізін білдірді.