Үндістан елінде өтіп жатқан «Хаттар» фестивалі аясында үнді-қазақ ақын-жазушыларының кездесуі өтті. Сахития академиясының Президенті, үнділік үздік қаламгерлер, Үндістандағы Қазақстан елшілігінің өкілі және делегация құрамы қатысқан шарада екі елдің әдеби байланыстары туралы әңгіме өрбіді. Кездесу барысында «Ұлы дала елі» мен «Қазақ хандары» кітаптары үнді еліне таныстырылды.
Мұның алдында «Хаттар» фестивалі (Үндістан, Нью-Дели) аясында Қазақстан делегацияның Sangeet Natak Akademi, Lalit Kala Akademi сынды өнер саласына жауапты ұйымдармен кездесулер өткен болатын.
Естеріңізге салайық, Қазақстан Республикасының Мәдениет және спорт министрлігі мен Үндістан Республикасының Мәдениет министрлігі арасындағы 2022-2025 жылдарға арналған мәдени алмасу бағдарламасы аясында Қазақстан жазушылар делегациясы Үндістанға әлем ақын-жазушыларының, аудармашылардың, баспагерлердің басын қосатын «Хаттар» фестиваліне қатысып жатыр. Делегация құрамында Қазақстан Жазушылар одағының және Түркі халықтары Жазушылар одағының төрағасы, ақын Ұлықбек Есдәулет, ақын Танакөз Толқынқызы, «Фолиант» баспасының директоры Нұрлан Исабеков, ҚР Ұлттық мемлекеттік Кітап палатасының директоры Әділ Қойтанов, ҚР Мәдениет және спорт министрлігі Архив істері және құжаттаманы басқару комитетінің Баспа ісі басқармасының басшысы Алмаз Мырзахмет бар.
