Өзбекстанда өткен бірінші басқосуда Түркі дүниесі Жазушылар одағының эмблема-логотипі қабылданды. Бұл туралы аталмыш одақтың төрағасы Ұлықбек Есдәулет әлеуметтік желідегі парақшасында хабарлады.
«Алдағы 2024 жылы атқарылатын іс-шаралар жоспары талқыланды. Сонымен қатар Түркі дүниесінің жыл сайын берілетін Әдеби сыйлығы тағайындалып, оны «Тұран сыйлығы» деп атау ұйғарылды. Солтүстік Қазақстан облысында биылғы жазда мерекеленетін Мағжан Жұмабайұлының 130 жылдық мерейтойы аясында Түркі дүниесі поэзия фестивалін өткізуді көздеп отырғанымызды хабарладық» - дейді Ұлықбек Есдәулет.
Естеріңізге салайық, наурыз айының басында Әзербайжан, Қазақстан, Қырғызстан, Өзбекстан, Түркия және Түркменстан жазушылар одағының басшылары одақ құру туралы келісімге қол қойған болатын. Түркі әлемінде алғаш рет құрылып отырған одақтың төрағалығына Ұлықбек Оразбайұлының кандидатурасы ұсынылып, бірауыздан мақұлданды. Ұлықбек Есдәулет бұл жұмысты қазіргі Қазақстан Жазушылар одағының басқарма төрағасы қызметімен қатар алып жүреді.
