Бүгін Қазақстан Республикасы Ұлттық мемлекеттік кітап палатасына Қазақстан Республикасы Әділет министрлігінің «Ұлттық зияткерлік меншік институты» РМК директоры Ербол Оспанов арнайы бас сұғып, мекеменің тыныс-тіршілігімен танысты.

Келелі кездесуде сөз бастаған Қазақстан Республикасы Ұлттық мемлекеттік кітап палатасының директоры Әділ Қойтанов қасиетті қара шаңырақтың ауыз толтырып айтарлық жұмыстарымен бөлісіп өтті.

Әңгіме барысында еліміздегі кітап ісі мен баспа саласы, кітап тарату мәселесі, соның ішінде авторлық құқық мәселесі талқыланды. Себебі, қазіргі таңда елдегі кітап және баспа ісі дамыған сайын авторлық құқықты сақтауға қатысты көптеген мәселе туындап отырғаны жасырын емес. Осы кездесу барысында сондай күрмеуі көп жағдайларды шешу барысы талқыланды. Өз кезегінде «Ұлттық зияткерлік меншік институты» РМК директоры Ербол Қанатұлы алдағы уақытта Астана қаласында авторлық құқық мәселесіне қатысты көптеген орталықтар мен авторлардың басын қосатын жиын өткізуге уәде берді.