Қоғамдық ұйымдар дегенде Қазақстан Жазушылар одағы еске түседі. Індет басталғанда, жазушылардың жылына бір рет жиналуына себепші болатын әдеби жыл қортындысы өтпейтін шығар деп ойлағанбыз. Жоқ, шығармашылық одақ, қиыннан қиыстырып жол тауып, өткен екі жылда да әлемжелі арқылы zoom-мен жыл қортындысын өткізгені есте.
Ал биылғы әдеби жыл қортындысы Жазушылар одағының ғимаратында өтетіні алдын ала әлеужелі арқылы хабарланды да, індет кезінде үйде отырып қалған ақын-жазушылар алыс-жақыннан біршама көп жиналғанын көрдік. Бір-бірімен сағынысып қалғандай шұрқырасып табысып жатты.
Бұрынғы жылдардағы үрдіспен әдеби жыл қорытындысы Әнұранмен басталды. Жиынды белгілі ақын, Қазақстан Жазушылар одағы басқармасы төрағасының орынбасары Бауыржан Жақып жүргізіп отырды. 2022 жылғы поэзия туралы ақын Болат Жетекбай, проза туралы жазушы Серік Нұғыман баяндама жасады. Әрине балалар әдебиеті, әдеби сын, сатира, деректі проза жанрлары бойынша да жүйелі баяндамалар тыңдалды. Өткен жылғы әдеби үдеріс жайлы толыққанды мәлімет айтылды деуге болады. Асып-тасып арнадан аспағанмен, бір қалыпты ағысты еске түсіретін үрдіс байқалады.
Биылғы әдеби жыл қорытындысының өзгешелігі – қортындыға жалғасып, Жазушылар Одағы басқармасының пленумы өткізілді. Пленумда жалғыз мәселе қаралды. Қазақстан Жазушылар одағының соңғы құрылтайы осыдан бес жыл бұрын өткізілген болатын. Енді одақ жарғысы бойынша биыл құрылтай өтуі керек. Пленум Қазақстан Жазушылар одағының кезекті құрылтайын алдағы 12 мамырда өткізуді ұйғарды.
Сондай-ақ бір топ қаламгерге «Қазақстанның құрметті жазушысы» атағы мен Халықаралық «Алаш» әдеби сыйлығы берілді. Атап айтқанда Ғаббас Қабышұлы, Сейфолла Оспан, Қойшығара Салғарин қатарлы 13 қаламгер «Қазақстанның құрметті жазушысы» атанса, Мейірхан Ақдәулетұлы, Төлеген Жанғалиев қатарлы 21 қаламгер Халықаралық «Алаш» әдеби сыйлығын иеленді.
«Ана тілі» газеті
