EXPO халықаралық кітап көрмесінде қаламгерлерге мемлекеттік қолдау көрсету мәселелеріне арналған «Кітап ісі: дәстүр және жаңашылдық» атты жиын өтті. Бұл туралы ҚР Мәдениет және спорт министрлігі Архив істері және құжаттаманы басқару комитетінің Баспа ісі басқармасының басшысы Алмаз Мырзахмет фейсбуктегі парақшасында хабарлады.

Жиында Архив, құжаттама және кітап ісі комитетінің 2022 жылғы атқарған жұмыстарының есебі мен құрылымдық өзгерістер, «Айбоз» ұлттық байқауының номинациялары мен шарттарын талдау, қоғамдық маңызы бар әдебиетті басып шығару және тарату жұмыстарын одан әрі жетілдіру мәселелері туралы сөз қозғалды.

«Айбоз» ұлттық байқауына қатысты қатысушылар тарапынан «Үздік кітап дизайны» номинациясын «Үздік әдеби сын» номинациясына ауыстыру, «Үздік әдеби аударма» номинациясының талаптарына толықтырулар енгізу, қабылданатын шығармалар көлемін ұлғайту сынды маңызды ұсыныстар айтылды.

«Қазақстандық Кітапханалық Одақ төрағасы Б.Оспанова, Қазақстан баспагерлері, полиграфистері және кітаптаратушылар Ассоциациясының төрағасы Ә.Қойтанов қоғамдық маңызы бар әдебиеттерді басып шығару және тарату жұмыстарын одан әрі жетілдіру мәселелеріне қатысты келелі ойларын бөлісті. Баспа ісі қызметкерлері күнін Кітапханашылар күнімен орайластыра отырып белгілеу ұсынысы көпшілік қолдауына ие болды», - дейді Алмаз Мырзахмет.