Қырғызстан астанасы Бішкек қаласындағы «Айтматовтың ізімен» атты кітап көрмесінің бүгін екінші күні өтіп жатыр. Бүгін А.Осмонов атындағы ұлттық кітапханада «Ш. Айтматов және билингвизм» тақырыбында жан жақтан келген қонақтар мен ғалымдардың қатысуымен конференция өтті.

Жиын барысында сөз алған Қазақстан Республикасы Ұлттық мемлекеттік кітап палатасының директоры Әділ Қойтанов сөз сөйледі. Ол өз сөзінде: «Екі тілде еркін ойлап, еркін жаза білу кез келген жазушының тәлейіне бұйыра бермейтін бақ. Ұлы тұлғалардың бойынан табылатын осындай дара қасиет әрқашан өнерді өрге сүйреп тұратыны ақиқат. Демек, екі ананы тел емгендей екі тілде еркін жазу өнерін – шығармашылықтың биік шыңы деп айтуға негіз бар», - деді.

Айта кетейік, кітапхана ішінде Абай атындағы қырғыз-қазақ мәдени орталығы бар. Әділ Қаженбайұлы жиыннан соң А.Осмонов атындағы ұлттық кітапхана басшылығымен жолығып, қазақстандық баспа өнімдерін кітапханаға тарту етті.

Одан кейін, құрметті қонақтар Шыңғыс Айтматовтың музей үйіне барып, аралап шықты. Бұл жерде заңғар жазушының бүкіл өмірінtн сыр шертетін талай құнды жәдігерлер бар. Ал екі күндік шараның қорытындысында қонақтар Шыңғыс Айтматовтың жатқан жеріне барып, ұлы қаламгердің рухына құран бағыштады. 

Естеріңізге салайық, Бішкек қаласындағы Халықаралық кітап және авторлық құқық күніне арналған «Айтматовтың ізімен» атты кітап көрмесі кеше басталған болатын. Оған Қытай, Ресей, Өзбекстан мен Қазақстан келген өкілдер қатысып жатыр. Биылғы шара заңғар жазушы Шыңғыс Айматовтың 95 жылдық мерейтойына арналған.