Миллионның үстінде майданға аттанған жасы мен жасамысы аралас қазақтардың алты жүз мыңнан астамы оққа ұшқан. Елге оралғандардың да көпшілігі мүмкіндігі шектеулі халде, денсаулығына ауыр зардап келген күйде келген. Бұл – ондаған, жүздеген миллион адамның басына түскен тарихи нәубет еді. 

Зұлмат соғыстың аяқталып, әділет жолында төгілген тер мен қанның Жеңіске айналғанына, жерін қорғаған батырлардың даңқты бейнесі заңғар биікке көтерілгеніне 76 жыл толып отыр. Кеңес одағы тарап, одақтас республикалардың көпшілігі егемендігін алғанына да ширек ғасырдан астам уақыт өтті. 

Тәуелсіз Қазақстанда Ұлы Жеңіс күні мерекесі жыл сайын кең көлемде тойланады. Өйткені, бұл жеңіс әлдеқашан сахнадан жоғалған Кеңес Одағына тиесілі болса да, оған жетер жолда ата-бабамыздың, одаққа даңқы кеткен батырлардың төккен тері, пида еткен жаны, асқақ рухы тұр. 

Коронавирус пандемиясы Ұлы Жеңістің мерейтойлары қарсаңында ұйымдастыралатын аса ауқымды шараларды шектеуге мәжбүр қылып отыр. Соған сәйкес, біз Ұлттық мемлекеттік кітап палатасының Баспасөз мұрағатындағы 1945 жылы жарық көрген «Социалистік Қазақстан» және «Казахстанская правда» газеттерінің бетінен тартымды суреттер мен мазмұнды мәтіндерді назарларыңызға ұсынғалы отырмыз. 



Ұлы Жеңіс күні мерекесімен барша қазақстандықтарды, барша Ұлы Отан соғысының ардагерлерін шын жүректен құттықтаймыз! Елімізде әрдайым бейбітшілік, ынтымақ-береке болсын!