Ұлттық мемлекеттік кітап палатасы апта басынан бері Наурыз мерекесіне орай түрлі шаралар өткізіп келеді. Аптаның әрбір күні қазақтың ежелден қалыптасқан жоралғыларына арналды. Бүгінгі күн – ұлттық салт-дәстүрлеріміз ұлықталатын күн. Осы күнге орай мекеме ұжымы «Қош келдің, әз-Наурыз» атты мерекелік іс-шара өткізді. 

Кітап палатасының қызметкерлері ұлттық дәстүрлерді жаңғырту жоспарланған күнге тыңғылықты дайындалды. Ұжымдағы өзара ауызбіршіліктің белгісіндей бірнеше топ – «Әжелер», «Абысындар», «Жастар» түрлі сахналық номерлер әзірледі. 

Әжелердің бірі Жаңа жылда молшылық болсын деген ниетпен шашу шашып, мекеме басшылығы ұжым қызметкерлерін құттықтағаннан кейін іс-шара өз ретімен жалғасты. 

Сырға салу

Қазақы дәстүр-салтымыздың кейбір түрлерін көрініс ретінде қойған «Әжелер» тобына әріптестері ерекше ықылас танытты. Көшпенді мәдениеттен бойымызға сіңген жұрнақ – қызға сырға салу дәстүрі. 

Оң жақта отырған қыздың сөз байласқан кісісі туралы жеңгесіне бір үзік сыр айтуы, жеңгесінің енесіне бұл туралы хабарлауы сахналанды. Бұдан бөлек, қызға сырға салуға келген топтың өздерін таныстыруы, келген жөнін жеткізуі, ата жолымен тоғыз атауы, орамал-шекпен жабуы, қызға бата беруі де ерекше көрініс берді.

Қыз айттыру, қызға ұрын бару, жеңгенің атқаратын рөлі, сырға салу сияқты жоралғыларды үлкен буын өкілдерінің кейінгі жастарға үлгі етіп көрсетуі, кем-кетігін түзетуі қуантады. «Ат тұяғын тай басар» дейтін халықтың бір-бірін тәрбиелеу жолы ерекше. Барлық тәрбиені, үйретерін күнделікті дағдыға әбден сіңірген. Тігісі жатқан тірліктің берекелі болары да сөзсіз. 


Абысындар жиыны

Кітап палатасының орта буын өкілдері – «Абысындар» тобы қыз ұзатуға дайындық туралы көрініс қойып, ән шырқады. Қыз ұзатқалы отырған ана өз абысындарын үйге жинап, жиған-терген дүниесін көрсетеді. «Келісіп пішкен тон келте болмас» дегендей, көпшілік жөн-жоралғыны ескере отырып, жасаудың кем-кетігін толтырады. 

Қазақ әйелдерінің кемеңгерлігін көрсететін осынау бір дәстүр де кейінгі кездері тұрмыстық салттан төбе көрсетпей жүргені рас. Жас буын осындай дүниелерді әбден ескеруі тиіс. Мұндай отырыстарда барыс-келістің, алыс-берістің жайы талқыланып, өзара байлам жасалады. 

Туыстық қарым-қатынастың мұндай міндеттері үлкен мен кішінің арасындағы қарым-қатынасты нығайта түседі. Әулеттегі ынтымақ пен берекенің болуы, татулық пен ауызбіршіліктің орнауы осындай шағын отырыстардан басталады. 

Ұлттық киім үлгілерін көрсету

Ұлттық мемлекеттік кітап палатасының «Жастар» тобының өкілдері – сұлу бойжеткендер ұлттық киім үлгілерін көрсетіп, қазақ қыздарының ұлттық нақыштағы болмысын паш етті. 

Сән көрсетілімі әрі қарай қазақтың ұлттық биі «Қара жорғамен» жалғасып, әлеуметтік қашықтық сақтаған ұжым қызметкерлері бой сергітті. 

Алғыс білдіру

Пандемия жағдайында барлық талаптарды сақтай отырып, Наурыз мерекесін түрлі бағытты атап өткен Ұлттық мемлекеттік кітап палатасының қызметкерлерін мекеме басшысы Әділ Қаженбайұлы мен оның орынбасарлары Маралтай Райымбекұлы және Толқын Тұрғалиқызы «Лучший қатысушы», «Лучший ойыншы», «Өнерлі әжелер», «Күміс көмей келіндер», «Ұйымдастыруға белсене араласқаны үшін» деген бірнеше номинация бойынша марапаттап, алғыс білдірді. 



Қорытынды сөз сөйлеген Ұлттық мемлекеттік кітап палатасының директоры Әділ Қаженбайұлы мұндай шаралардың маңызы туралы, Наурыз мерекесінің бүкілхалықтық деңгейдегі маңызы жыл санап артып келе жатқанын айтып, мекеме қызметкерлерін Жаңа жыл мерекесімен құттықтады. 

Дәстүр-салт – біздің аманатымыз. Бабалар сақтаған қазақы жолды жоғалтпай, мән-маңызын төмендетпей кейінгі буынның бойына сіңіру керек. Наурыз – Жаңа жыл жақсылығымен келсін, ынтымақ-бірлігіміз берік болсын!