Қазақстан Республикасы Ұлттық мемлекеттік кітап палатасының ұжымы Наурыз мерекесі қарсаңында қазақы ұлттық дәстүрлерімізге, ежелден қалыптасқан дағды-салтымызға қатысты сұрақ-жауап сипатындағы командалық сайыс өткізді. 

Командаға жасақталған қызметкерлер ұйымдастырушы жастар қойған сұрақтарға жауап беріп, өзара бақ сынады. Командаларға Ұлттық мемлекеттік кітап палатасының директоры Ә.Қойтанов, директор орынбасарлары М.Ыбыраев пен Т.Салменбаева қазылық етті. 

Сауалдардың дені ұлттық салт-дәстүрімізге, ұлттық дағдыларымызға бейімделген. Ұжым қызметкерлері қойылған сұрақтарға белсенді түрде жауап беріп, дәстүр-салтымыздан хабардар екенін байқатты. 

Наурыз – жаңғыру айы, Жаңа жылдың басы. Осынау түркі дүниесіне ортақ қадірлі мереке қарсаңында буынаралық байланыс тереңдеп, үлкеннің кішіге үйрететін міндеті, кішінің үлкенге көрсетер құрметі көрініс береді. 

Мәңгілік Елдің дағдысы – болашақ ұрпақты үздіксіз тәрбиелеу. Білім беріп, ұлттық құндылықтарымызды бойына сіңірсек, Қазақстанның, қазақ жұртының Мәңгілік Ел болары сөзсіз!