ҚР Ұлттық мемлекеттік кітап палатасы Наурыз мейрамы қарсаңында, сондай-ақ, Қазақстан Республикасы Тәуелсіздігінің 30 жылдығы аясында «Ұлттық киімдегі ұжым» эстафетасын бастайды. 

Зерлі шапан, ою-өрнегі келіскен қамзол – ғасырлар бойы халқымыздың ұлттық атрибуты саналып келе жатқан бұйымдар. Ұлттық нақыштағы кез келген киімнің жарасымдылығы, денсаулыққа пайдасы, қазақылық кейіпті ашатыны уақытпен дәлелденген. 

Көшпенді жұрттың өзіндік сән-салтанаты, ұлттық әдет-ғұрпы, салт-дәстүрі әбден қанымызға сіңген, ана сүтімен бойымызға дарыған. Күмбірлеген күй, әуелеген дәстүрлі ән, келісті тұлпар әрбір қазақтың бойындағы ұлттық рухын аспандатып, болмысын биіктетеді. 
Ұлттық болмыс – қазақылықтың қазығы. Осындай керемет дәстүрімізді, бабалар жолын жалғастыру, ұлттық мұрамызды сақтау – біздің міндетіміз. 

Түркі дүниесіне ортақ Наурыз мерекесі қарсаңында ұлттық құндылықтарды жаңғыртуға мән берген абзал. ҚР Мәдениет және спорт министрлігінің Наурыз мерекесін 10 күн бойы тойлау жөніндегі тұжырымдамасы да ұлттық болмысымызды жаңғыртуды, бабалар жолын насихаттауды мақсат етеді. 

Ұлттық мемлекеттік кітап палатасының қызметкерлері наурыз айының басынан бастап ұлттық нақышта киінетін дәстүрлі үрдісін жалғастырды. Ел Тәуелсіздігінің 30 жылдық мерейтойы қарсаңында осынау керемет әрі маңызы жоғары дәстүрді Қазақстан Республикасы Мәдениет және спорт министрлігіне және оған қарасты барлық мекемелерге эстафета ретінде жолдаймыз.

«Ұлттық киімдегі ұжым» бастамасын қолдап, қазақы дәстүрді жаңғыртуға атсалысайық!