Бүгін Ақтоты Райымқұлова жыр алыбы Жамбыл Жабаевтың 175 жылдық мерейтойының ресми ашылуына арналған салтанатты жиында еліміз бойынша атқарылатын іс-шаралар туралы баяндады. Іс-шараға Қазақстан Республикасының Мемлекеттік хатшысы Қырымбек Елеуұлы Көшербаев, Қазақстан Республикасы Президент Әкімшілігінің басшысының бірінші орынбасары Дәурен Әскербекұлы Абаев қатысты. 

«Жамбыл Жабаевтың биылғы мерейтойында айтулы ақынның өмірі мен шығармашылығын жалпы ұлт мақтанышы ретінде ғана қарастырмай, жас ұрпақтың тарихи танымын кеңейтіп, патриотизм мен отансүйгіштікке тәрбиелеудің ықпалды құралына айналдыру межеленіп отыр. Жамбыл құдіреті, оның дүние дидарына жайылған даңқы дала төсіндегі дара дәстүрді паш етті. Тек өз тіліндегі тұма жырмен сусындап өскен ақынның халық әдебиетін әлемдік деңгейге аспандатты. Бұл ерекшелікті Қазақстан Республикасының Тұңғыш Президенті – Елбасы Нұрсұлтан Назарбаев Жамбылдың 150 жылдығына арналған салтанатты жиналыста сөйлеген сөзінде: «Жамбыл сан ғасырлық ақпа-төкпесуырып-салма ақындық өнердің, жыраулық дәстүрдің көшін ілгері апарып, осы заманға жеткізген және небір тарихи өзгерістерді сол үрдістен алшақ кетпей-ақ жырлай білген заңғар құбылыс»,- деп айшықты да анық айтқан.

Демек, Жамбыл жыры бізді далалық дәстүрлеріміздің жаңа замандарға да жақсы жарасатын қымбат қасиеттерін қадірлеуге, қастерлеуге үйрететін үлгі. Жыр алыбының 175 жылдық мерейтойын өткізу бойынша іс-шаралар жоспары бекітілді.
Соған орай, мерейтойлық жыл ішінде республика бойынша 500-дей әлеуметтік, имидждік, ғылыми, танымдық іс-шара өтеді. Бұдан бөлек, ақын өмірінен фильмдер түсіру, өлеңдерінің жаңа жинақтарын шығару, кітап көрмелерін ұйымдастыру, мерейтойлық монета, пошта маркасын әзірлеу т.б. іс-шаралар көзделіп отыр. Жамбыл поэзиясы өткен ғасырда да, жаңа ғасырда да небір сындардан өтіп, еркіндік сүйген өршіл халқының рухын көтеруде, ұлтымызбен бірге жасап келеді және мәңгілік жасай береді», - деді Ақтоты Рахметоллақызы.