Қазақстан Республикасы Мәдениет және спорт министрі Ақтоты Райымқұлова Алматы қаласына арнайы келіп, Ұлттық кітапхана қабырғасында министрлікке қарасты мекемелердің бірінші басшыларымен және мәдениет, өнер саласының өкілдерімен кездесті.
Ақтоты Рахметоллақызы кездесу барысында өткен жылы Абай Құнанбайұлының 175 жылдық, Әбу Насыр әл-Фарабидің 1150 жылдық мерейтойларын кең көлемде атап өтуге ерекше еңбек сіңірген азаматтарға Қасым-Жомарт Кемелұлы Тоқаевтың арнайы Алғыс хатын табыстады.
Қазақстан Республикасы Ұлттық мемлекеттік кітап палатасының директоры Әділ Қаженбайұлы Қойтанов пен директор орынбасары Маралтай Райымбекұлы Ыбыраев Президенттің Алғыс хатымен марапатталды.
«Халқымыздың ұлы ақыны Абай Құнанбайұлының 175 жылдық және дала данышпаны, әлемнің екінші ұстазы Әбу Насыр әл-Фарабидің 1150 жылдық мерейтойларына арналған іс-шараларды ұйымдастыру мен өткізуге қосқан үлкен үлесіңіз үшін Сізге алғысымды білдіремін.
Аталған мерейтойлар аясында қазақстандықтардың, әсіресе жас ұрпақтың санасына ұлы тұлғалардың өнегесін сіңіруге, тағлым алуға елеулі жұмыс жүргізілді. Бірқатар шетел халқын хакім Абайдың және ұлы ойшыл әл-Фарабидің мұрасымен қатар, отандық мәдениет пен өнердің жетістіктерімен таныстырудың зор мүмкіндігі туды.
Тәуелсіз Отанымызды өркендету жолындағы қызметіңізге толайым табыс тілеймін!» - деп жазылған мемлекет басшысының Алғыс хатында.
Ұлттық мемлекеттік кітап палатасының ұжымы Әділ Қаженбайұлы мен Маралтай Райымбекұлын шын жүректен құттықтайды!
