15–19 қазан күндері Германияның Франкфурт қаласында өтетін «Frankfurter Buchmesse 2025» халықаралық кітап жәрмеңкесінде Қазақстан өз ұлттық стендін ашып, отандық баспалардың жаңа туындыларын әлем жұртшылығына таныстырды.
Биыл 77-рет ұйымдастырылып отырған әйгілі Франкфурт кітап жәрмеңкесінің құрметті қонағы – Филиппин мемлекеті. Әлемнің түкпір-түкпірінен келген баспагерлер мен жазушылар бас қосқан ірі мәдени шараға Қазақстаннан 30-дан астам делегация қатысуда. Олардың қатарында еліміздің жетекші баспалары – «Мектеп», «Алматыкітап», «Атамұра», «ARMAN-PV», «Steppe & World Publishing», «Эверо», «Kazformoms», «АmalBooks» және басқа да отандық баспа өкілдері бар.
Қазақстандық стенд ҚР Мәдениет және ақпарат министрлігінің қолдауымен ұйымдастырылып, халықаралық деңгейдегі баспалармен әріптестік байланыстарды дамытуға жол ашты. Биыл көрмеге 350-ге жуық қазақстандық кітап қойылып, олардың ішінде көркем әдебиет, ғылыми және балаларға арналған жаңа басылымдар таныстырылды.
Көрменің басты мақсаты – кітап саудасын халықаралық деңгейде ілгерілету, баспа нарығын дамыту және жазушылар мен баспагерлердің өзара байланысын күшейту. Қазақстан стендіне келген шетелдік қонақтар еліміздің әдеби әлемімен, заманауи баспа ісінің дамуымен және ұлттық мәдениетпен кеңінен танысу мүмкіндігіне ие болды.
Жаңа туындылардың тұсаукесері
Көрме аясында бірқатар маңызды тұсаукесерлер өткізілді. Атап айтқанда, неміс жазушысы Anja Tuckermann қатысқан жеті тілге аударылған «Абайдың қара сөздері. Ұрпаққа Ұлағат» кітабының таныстырылымы үлкен қызығушылық тудырды.
Сонымен қатар, «Менің Қазақстаным» сериясындағы «Ұлы тұлғаларға» арналған «Шоқан. Шығыстың жарық жұлдызы», Оразалы Сәбденнің «Түркі, Әлем өркениеті, Қазақстан және болашақ» («Эверо» баспасы), «Мектеп» баспасынан шыққан «Симантика. Өю-өрнектер» (үш тілде), «Arman-PV» баспасының «Көшпенділер ойындары / Nomad Games / Игры кочевников», «Атамұра» баспасының «Қазақстан – қызғалдақтар отаны» атты еңбектері мен «Steppe & World Publishing» баспасынан жарық көрген Ырысбек Дәбейдің «Қоңыз», Үміт Жұбанышеваның «Шаңырақтың иесін іздеймін» кітаптарының тұсаукесерлері болмақ.
Сондай-ақ, ақын Дүйсенәлі Әлімақынның «Америка ашқан қазақтар» атты еңбегінің таныстырылымында Германиялық журналист және аудармашы Artur Weigandt қатысады.
«АmalBooks» баспасының директоры Бақытжан Бұқарбайдың модератарлығымен «Қазақстандық авторлардың еңбектерін шет тілдеріне аудару мәселелері және аударма ісіндегі мүмкіндіктер мен кедергілер» тақырыбы талқыланады.
Ал қазақ әдебиетінің классикасы саналатын Міржақып Дулатовтың «Бақытсыз Жамал» романының таныстырылымы ерекше форматта өткізілмек.
Халықаралық әріптестікке жол
Қазақстан Республикасының Майндағы Франкфурт қаласындағы Бас консулы ұлттық стендке арнайы келіп, отандық делегацияға қолдау білдірді.
Көрме барысында Канада, Қытай, Түркия, Әзербайжан, Дания, Германия, Сингапур және басқа елдердің баспагерлері қазақстандық әріптестерімен кездесу өткізіп, ынтымақтастықтың жаңа бағыттарын талқылады.
Сонымен қатар, қазақстандық өкілдер өзге мемлекеттердің стендтеріне барып, баспа ісі саласындағы тәжірибе алмасу мен серіктестік мүмкіндіктерін қарастырды.
