Ұлттық мемлекеттік кітап палатасы – 80 жылдам астам тарихы бар, ел руханиятындағы орыны бөлек мекеме. Кітап палатасының мұрағатындағы бес миллионға жуық еңбектердің жүйелі жиналып, осы күнге дейін сақталуына үлес қосқан қызметкерлер ел Тәуелсіздігінің 30 жылдығы қарсаңында «Мәдениет саласының үздігі» төсбелгісімен марапатталды.
Кітап палатасына арнайы келген ҚР Мәдениет және спорт министрлігі Архив істері және құжаттаманы басқару комитеті төрағасының орынбасары Гүлзира Елебаева үздіктердің марапатын өз қолымен табыстады.
ҚР Ұлттық мемлекеттік кітап палатасы директорының орынбасары Салменбаева Толқын Тұрғалиқызы мен екі тәжірибелі қызметкер – Күлзада Нұралиева және Жібек Жексембаева «Мәдениет саласының үздігі» төсбелгісінің иегері атанды.
«Еліміздің мәдениет саласындағы ұзақ жылдар бойы еткен елеулі еңбектеріңіз, архив істерін дамытуға қосқан сүбелі үлестеріңіз бағаланады. Биыл Тәуелсіздіктің 30 жылдығы қарсаңында біз саладағы үздік мамандар қатарында сіздерді де осы марапатқа лайық деп білдік. Өздеріңіздің жиған тәжірибелеріңізді, көрген-білгендеріңізді жас мамандарға үйрете беріңіздер. Сіздерді шын жүректен құттықтаймын!» - деді ол.
Кітап палатасының директоры Әділ Қаженбайұлы өз кезегінде саладағы салмақты марапатқа ие болған қызметкерлерді құттықтап, олардың қызмет жолы, мекемеге сіңірген еңбегі туралы тарқата айтты.
Төсбелгі иеленген қызметкерлер атынан Кітап палатасы директорының орынбасары Толқын Тұрғалиқызы сөз алып, министрге және комитет төрағасына алғысын білдірді.
«Біздің жұмысымызды елеп-ескеріп, айтулы мереке қарсаңында марапатқа ұсынған басшымызға, оны қолдаған жоғары басшыларға алғыс білдіреміз! Арнайы марапаттауға келген Гүлзира ханымға да рахмет айтамыз. Қызметкерлерді ынталандырып, жас мамандардың ұмтылысын, ынтасын арттыратын осындай дүниелер көп болсын!» - деді ол.
