Қожа Ахмет Ясауи атындағы халықаралық қазақ-түрік университеті Еуразия ғылыми-зерттеу орталығы ҚР Ұлттық мемлекеттік кітап палатасынана ынтымақтастық һәм әріптестік-серіктес болу жөнінде ұсыныс білдірді. 

Ынтымақтастық негізінде қос тарап ізденушілер мен жас ғалымдардың өзара тәжірибе алмасуын, академиялық құрамның ғылыми сапасын арттыруына қолдау көрсетуді, бірігіп түрлі ірі шаралар (симпозиум, семинар, конференциялар) өткізуді, өзара арнайы бағыттағы жобалар мен бағдарламаларды жүзеге асыруды көздейді. 

Кездесу барысында Қожа Ахмет Ясауи атындағы халықаралық қазақ-түрік университеті Еуразия ғылыми-зерттеу институтының директоры Вакур Сүмерге ҚР Ұлттық мемлекеттік кітап палатасының директоры Әділ Каженбайұлы мемлекеттік мекеменің негізі атқаратын қызметін таныстырып, атқарылып жатқан жобалар туралы әңгімеледі. 

Өз кезегінде аталмыш институттың директоры бірқатар мерзімді басылымдарын, ғылыми-зерттеу жұмыстарына арналған журналдары мен кітапшаларын көрсетіп, аймақтық ғылымды насихаттауда, дамытуда атқарылып жатқан жобалары туралы айтты. 

Еуразия ғылыми-зерттеу институты Кітап палатасының қорындағы көне әрі құнды деректермен танысып, халықаралық басылымдарда еліміздің марғасқалары туралы материалдар жариялауды, ғылымды дамытуға мүдделі азаматтардың, жас ғалымдардың ізденісіне қолайлылық туғызатын библиографиялық көрсеткіштер жинақтауды көздеп отыр. 

Сондай-ақ, биылғы ұлт бәйтерегі Абайдың 175 жылдық мерейтойы қарсаңында қос тарап тізе қосып, ұлы ойшыл туралы айтылған, жазылған күллі материалды бір кітапқа жинастырмаққа келісті. 

«Кітап палатасына Қазақстанның кез келген жерінде жарық көрген мерзімді басылым, ғылыми жинақ және кітаптардың міндетті данасы келіп түседі. Бұл – Заңмен бекітілген борыш. Кейін ол дүниелердің барлығы тіркеліп, қатталып мұрағатқа өтеді. Қазіргі уақытта мұрағатты цифрландыру, кітап шежірелері мен газет-журналдар шежіресінің басылым санын арттыру бойынша жұмыс жасалып жатыр. Қорымызда жалпы саны 5 миллионнан асатын міндетті дана бар. Алғашқысы 1899 жылдан басталады», - деді ҚР Ұлттық мемлекеттік кітап палатасының директоры Әділ Каженбайұлы. 

«Бұл – өте керемет дүние, үдеріс. Сіздер Қазақстанның ғана емес, күллі түркі дүниесінің қазынасы екенсіздер. Осындай мехнатты әрі жауапкершілігі мол жұмысты абыройлы атқарып келе жатқаны үшін Түркі жұртшылығы атынан Кітап палатасының ұжымына, сіздерге ризашылық білдіргім келеді», - деді Еуразия ғылыми-зерттеу орталығының директоры Вакур Сүмер. 

Кездесу соңында қонақтарға Абай Құнанбайұлының бюсті сыйға тартылып, ынтымақтастық мәмілеге келген қос тарап біріге жұмыс істеуге уағдаласып тарасты.