Бүгін ҚР Мәдениет және спорт министрлігі Архив ісі және құжаттаманы басқару комитеті Ұлттық мемлекеттік кітап палатасы мен Қазақстан Баспагерлер, полиграфистер және кітап таратушылар Ассоциациясының ұйымдастыруымен, ҚР Әділет министрлігінің және осы министрлікке қарасты Ұлттық зияткерлік меншік институты мамандарының, баспагерлердің және авторлардың қатысуымен авторлық құқық жөніндегі онлайн-семинар өтті. 

Онлайн-семинардың басты мақсаты – Қазақстан Республикасының баспа ісі саласындағы авторлық және сабақтас құқықтар жөніндегі шешімі шиеленіскен негізгі мәселелері туралы Ұлттық зияткерлік меншік инстиуты мен Қазақстан Баспагерлер, полиграфистер және кітап таратушылар Ассоциациясының мүшелігіндегі баспа өкілдерінің тікелей кездесуін ұйымдастырып, өзекті сұрақтарды талқылау және баспа саласындағы жетекші мекемелердің қызметкерлерінің құқықтық сауаттылығын арттыру.

Іс-шараға еліміздің жетекші баспаларының өкілдері, Ұлттық зияткерлік меншік институтының Авторлық құқық басқармасының басшысы Раушан Аввалова, Қазақстан Жазушылар Одағының басқарма төрағасының бірінші орынбасары Мереке Құлкенов, Қазақстан Баспагерлер, полиграфистер және кітап таратушылар Ассоциациясының вице-президенті Алмаз Шәйкен және бұқаралық ақпарат құралдарының өкілдері қатысты. Онлайн-семинарға 50-ге жуық адам қатысып, ондаған жеке сұрақтар қойылды, бірнеше мәселе көтерілді. 

Жиын барысында авторлар мен баспагерлер ҚР Әділет министрлігі мен оған қарасты мекемелердің өкілдеріне көкейтесті сұрақтарын қойып, бірқатар өзекті мәселелер талқыланды. 

Басқосу соңында тараптар осы онлайн-семинарды белгілі бір уақыт межесінде жүйелі түрде өткізіп тұруға және талқыланған мәселелер бойынша нақты жұмыстар істеуге уағдаласты. 

Іс-шара туралы толық сараптама материалдар алдағы уақытта еліміздің жетекші басылымдарында жарық көреді.