Алматы қаласында 5 қарашада «KITAP FEST KIDS» кітап фестивалі өтеді. Биыл 8-ші мәрте өткелі отырған фестиваль барысында қала тұрғындары мен қонақтар кітаптарды жеңілдікпен сатып алып, өзара кітап алмаса алады.

«Пандемия кезінде болмаса, фестиваль жыл сайын өтіп келеді. Шараның негізгі мақсаты – халыққа кітап оқуды кеңінен насихаттау. Екіншіден, әлі танылмаған жас жазушыларға қолдау білдіру, яғни, олардың шығармаларын халыққа ұсыну, өз оқырманын табуға көмектесу. Үшіншіден, баспагерлерді қолдау. Бұл әлемдік кітапфест қауымдастығына кіретін Қазақстандағы жалғыз кітап фестивалі. Ол барлық қатысушылар үшін тегін өтеді»,- дейді Майра Әлжанова.

Спикердің сөзінше, фестиваль биыл балаларға арналады. Сондай-ақ, қазіргі таңда қазақ тіліне аударылған шетелдік әдебиеттерді оқырман жақсы қабылдаған.

«Қазір еліміз жазушыларының кітаптарымен қатар, шет ел әдебиетін қазақ тіліне аударып, жарыққа шығарып жатқан баспа үйлері бар. Мысалы, «Qasym», «Steppe & WORLD Publishing» , «Abay Books», «Meloman Publishing «, басқа да баспа үйлері бар. Олар қазақ тіліне шетелдік әдебиеттерді, атап айтқанда, «Дисней» ертегілерін, Гарри Поттердің 7 томдығын және өзге де кітаптарды аударып, шығарды. Негізі, ТМД елдеріне шетел әдебиеттері Ресей арқылы орыс тілінде тарайды. Оларды қазақ баспа үйлері ана тілімізге аударады. Бұл – қуанарлық жағдай«,- деді ол.

Дереккөз: ҚазАқпарат