Ақын, Қазақстан Жазушылар Одағының мүшесі, Т. Айбергенов атындағы сыйлықтың иегері ҒАЙСА-ҒАЛИ СЕЙТАҚТЫҢ «ЖЫҒЫЛМАС ЖАЛҒЫЗ БАР ТУЫМ» атты жаңа кітабы жарық көрді. Бұл жинаққа ақынның кейінгі жылдары жазылған өлеңдері, «Әбілқайыр хан», «Сырым би» атты тарихи дастандары енгізілді. Кітап Қазақстан Жазушылар Одағы БҚО филиалында беттеліп, Орал қаласындағы «ШұғылаПринт» баспасынан басылып шықты.

Ақын өткенге көз жүгіртіп, қазақ хандары мен батырларының ерлік істерін, батыл шешімдерін жырға қосады. Ертеңі үшін алаңдап, қоғамдағы келеңсіздіктерді сынға алады. Туған жерінің табиғатын тебірене суреттеп, оқырманды Отанды сүюге шақырады. Жастарға танымал тұлғалардың бірегей болмысын үлгі етеді.

Айта кетейік, бүгінге дейін қаламгердің «Маңдай», «Аман бол, атамекенім», «Нарынның нар ұлдары», «Ай-арудың алқасы», «Тек пен тамыр», «Жақыным менің – жалпақ ел» және «Қасиет қонған қара жер» атты кітаптары жарыққа шыққан болатын. «Отаным, Орда, Оралым», «Шер-шындық», «Ерлеріменен ел мықты» атты үш бөліммен тұратын жаңа жыр жинақтың өз оқырманын тауып, көпшіліктің көңілінен шығатынына сенімдіміз.