Бүгін Zoom бейнебайланыс құралы арқылы ҚР Мәдениет және спорт министрлігі Архив істері және құжаттаманы басқару комитетінің төрағасы Қуат Борашев баспа ісі саласындағы мәселелерді талқылау мақсатында сала мамандарымен, ардагер жазушылармен онлайн кездесу өткізіп, бірқатар сұрақтарды талқылады.
Онлайн басқосуға ҚР Ұлттық мемлекеттік кітап палатасының директоры Әділ Қойтанов, белгілі ақын Нұрлан Оразалин, жазушы Жақау Дәуренбеков, Әшірбек Көпішев, Ғарифолла Әнес, Темірғали Көпбаев және басқа да сала мамандары қатысты.  

Қуат Қаһарманұлы отыздан астам баспа өкілдері мен қаламгерлер қауымының белді мүшелеріне комитеттің жұмыс бағыты туралы, қолға алынып жатқан жобалар және атқарылып жатқан жұмыстар туралы таныстырып өтті. Сонымен қатар, жаңа комитеттің жаңа төрағасы баспа ісі саласындағы кез келген мәселені көтеріп, заң аясында шешуге мүдделі екенін жеткізді. 

Екінші болып сөз алған ҚР Ұлттық мемлекеттік кітап палатасының директоры Әділ Қаженбайұлы «Қоғамдық маңызы бар әдебиеттерді басып шығару және тарату» мемлекеттік бағдарламасының жұмыс процесі туралы, жаңа форматта кітап қабылдаудың көпшілікке қалай әсер еткені туралы және саладағы кітап шығару мәселелері туралы айтты. 

Қазақстан Жазушылар одағын ұзақ жыл басқарған Нұрлан Оразалин қазақ әдебиеті мен қазақ баспа ісі арасындағы өзара қарым-қатынас және кітап шығаруда мән берілуі тиіс түйдек мәселелер төңірегінде ой толғамдарын ортаға салды. 

Ал Әшірбек Көпішев, Темірғали Көпбаев, Ғарифолла Әнес сияқты сақа баспагерлер баспа ісі саласындағы инақты мәселелерге тоқталып, шешімін таппай келе жатқан сұрақтардың баршылық екенін комитет төрағасына жеткізді.

Жиын барысында баспа ісі саласын дамыту, кітаптардың сапасын арттыру, авторлық және сабақтас құқықтар бойынша туындап келе жатқан мәселелерді реттеу сияқты маңызды ұсыныстар талқыланды. 

Қорытынды сөзінде Қуат Қаһарманұлы бұл саладағы кез келген оң бастаманы қолдайтынын, сала қызметкерлерінің ұсыныстары мен мәселелерін заң аясында шешілуіне ықпал ететінін айта келіп, баспагерлер мен қаламгерлерді өзара ынтымақтастықта, тығыз қарым-қатынаста жұмыс істеуге шақырды.