►    15 ақпан Алматы қаласы Мәдениет басқармасының ұйымдастыруымен Қазақстанның еңбек сіңірген қайраткері, I-ші дәрежелі «Барыс» және «Парасат» орденінің иегері, «Жыл адамы – Алтын адам», «Платина Тарлан» және «Халықтың сүйіктісі» ұлттық сыйлығының лауреаты, Алматы қаласы Мемлекеттік архивінің 650 қорқұрушысы, ақын Шөмішбай Сариевтің «Дүниені жалт қаратсам деп едім» атты музей-бұрышының ашылу рәсімі өтті.
       Іс-шараның мақсаты – Шөмішбай Сариевтің шығармашылық жолын дәріптеу. Шараны Алматы қаласы әкімінің орынбасары Арман Оразбайұлы Қырықбаев құттықтау сөзімен ашты. Жазушы, кинодраматург Смағұл Абатұлы мен ақын, драматург, мемлекет және қоғам қайраткері Нұрлан Оразалин ақынның құрметіне ашылған музейдің лентасын қиды. 
Кеш қонағы Қазақстанның халық әншісі Мақпал Жүнісова Шөмішбай Сариевтің сөзіне жазылған «Қайран уақыт» әнін жанды дауыста шырқады. 
Шараны ұйымдастырушы ақынның жұбайы – Сариева Жұмагүл Қаженқызы. 
«Күнде таңертең радиодан ағаңның әндерін тыңдаймын. Оразамды ағаңның әндерімен ашамын» ,- дейді Жұмагүл апай. Шөмішбай ағаның қызықты оқиғаларын еске түсірген бұл шара Мақпалдың  әдемі әнімен қорытындыланды...