2021 жылдың 18-21 ақпан аралығында Минск қаласында «Кітап адамзат пен елдерді біріктіреді» деген лозунгпен XXVIII Халықаралық кітап көрме-жәрмеңкесі өтті. Әлемдік деңгейдегі кітап көрме-жәрмеңкесіне жиырмадан астам ел белсенді түрде қатысты, соның бірі – Қазақстан Республикасы.

Кітап көрме-жәрмеңкесі аясында «Жазушы және уақыт» («Писатель и время») атты дәстүрлі симпозиум өтті. Қазақстан Республикасы атынан Мемлекеттік сыйлықтың лауреаты, ақын Бақытжан Қанапиянов баяндама жасады. 

«Қазақ-беларусь арасындағы әдеби қарым-қатынастың кем дегенде жүз жылдық тарихы бар. Минск қаласында қазіргі заманғы қазақ ақындары мен жазушыларының беларусь және орыс тіліндегі аудармалары үздіксіз жарық көруде. Оның ішінде Олжас Сүлейменовтің, Любовь Шашкованың, Светлана Ананьеваның, Нұрдәулет Ақыштың және басқа да авторлардың шығармаларын ерекше атап өтуге болады. Абайдың, Немат Келімбетовтың шығармалары беларусь тіліне аударылды. Екі ел арасындағы ынтымақтастыққа негізделген байланыс аясында әлі де жаңа жобалар жүзеге асатынына сенемін», - деді ол. 

Минск қаласында өтіп жатқан Халықаралық кітап көрме-жәрмеңкесінің аясындағы симпозиумға Бақытжан Мұсаханұлы Ұлттық мемлекеттік кітап палатасының ғимаратына арнайы келіп, онлайн түрде қатысты. 

Бақытжан Мұсаханұлы – «Казахстан – Беларусь» әдеби альманахын үздіксіз шығарып келе жатқан тұлға. Сондықтан, оның есімінің Беларусь жеріндегі салмағына ешкім шүбә келтірмейді. Халықаралық кітап көрме-жәрмеңкесі аясындағы симпозиумда Бақытжан Қанапияновтың баяндамасы жоғары деңгейде оқылды.